تكمله الحلقه الاولى "علام المغنواتى يتحدى عمرو دياب "ء
^
^
إنتى عارفه إن مفيش منتج عبرنى ، وكل ما أروح لحد وأغني له أي حاجه للأستاذ "محمد حماقى " أو الأستاذ "تامر حسنى" يقول لي "يالا ياض يا أهبل إشك روح للحاجه خليها تحميك وتحلق لك !".. يرضيكى كده ؟ ورغم كل اللى إنتى عارفاه ده برضه بتجيبيلى سيرة"عمرو دياب" و إنتي عارفه إزاى السيره دى بتضايقنى !ء
ياعم أنا مش فاهمه بتضايقك فى إيه بس ! يعنى هو أنت مطرب زميل وبينافسك مثلا! ده أنت مش عايز لا تقابل أبويا ولا تجيبلي أي هديه زي أي شاب بيحترم نفسه ، عشان بتجمع فى فلوس الألبون !هتفضل فى ده طول عمرك يعني وتركني جنبك !! إنت عارف إن "أشكيناز " صاحبتى -الواد اللى بتحبه "كسيب" وعنده عربيه "زرفيز" كمان !! وقابل أبوها وهيجيب لها شبكه بتمناشر ألف جنيه !!ء
زرفيز! إنتى واقعه على دماغك وإنتي صغيره ولا أيه ؟ أقابل أبوكي وأجيبلك هدايا ودباديب وهأ ومأ وشخاليل! ، هو ده كل طموحك فى الحياه ؟، مش تقفى جنب حبيبك عشان يعدي بقى مع اللى عدوا ، ده أنا هنغنغك يا بت ،هوديكى تاكلى فى" هارديز" وأدخلك سيما وأجيبلك طقم الحلل اللى كان عاجبك ، بس وحياة غلاوتى عندك تقفي جنبي بس من الوقفه اللى هيا دي ..ها ؟
كان رد فعل "سيهير" أغرب من إنى أتصوره فى اللحظه دي :"عمرو دياب" ، "عمرو دياب" ، "عمرووووو ديااااب " ، نياهاهاهاهاهاا - عشان بتحرق دمك زي ما أنت حارق دمي ! وكأنها مؤامره عليا ،، لقيتهم شغلوا فى الكازينو المعفن ده اللي كل الأغانى اللي بيشغلوه فيه بتتراوح مابين " صحيت من نومى فجأه " و "العنب ومشتقاته" - لقيتهم لعبوا أغنيه لعمرو دياب كمان !ء
إتجننت وشيطت وجبت جاز وصرخت : كفاااااااااايه !ء
وإذ فجأتن لقيت راجل عجيب الشكل والهيئه جي عليا بعد صريخى المتواصل ده - راجل أصلع صلعه لامعه بشكل مستفز، صاحب كرش محترم ،ولابس بدله أقرب ما تكون الى بدل السمكاريه زيتية اللون ،وقبل ما يقرب لى قدرت أشم ريحة برفيوم تقيل الريحه لدرجة أنه يطبق على روحك نفسها ! المهم أنه جالى ولقيته بيبص لي و على وشه إبتسامه سمجه كده وحط إيده على كتفي وبصوت واثق وجهورى قال :"إيه يا برنس ؟مالك متعصب ومتضايق أوي كده ليه ؟ هو "عمرو دياب "واكل عليك فلوس ولا أيه ؟ نياهاهاهاهاهاها !"ء
بصيت له بقرف كده وقلت له "وإنت مالك يا أخ ؟!ء
بنفس الابتسامه الملزجه السمجه دى قاللى "هدي نفسويتك كده بس وخد مني ،،أنا غير متعمد طبعا سمعت جزء كبير من محادثتك الشيقه مع المودام بتاعتك ،، أقدر أقولك وببساطه إنك واقف قدام الراجل المناسب فى الوقت المناسب ! "ء
ناولني الكارت بتاعه بعد المقدمه العجيبه دي ، وبعد ما شد كرسي وشاركنا القعده اللطيفه على ترابيزتنا
الأستاذ الدكتور /عبدو لمعة اخصائي إكتشاف النجوم وتلميعهم وتفليتهم وسنجفتهم،، خريج معهد التلحين تحت الميه،، وحاطط 5 أرقام موبايل و 3 إيميلات و سايتين للكارت ،، فكرني بكروت أصحاب الجزاره اللي بيحطوا فيها صورهم وولادهم!ء
واضح إن الراجل ده كان طموحه فى الحياه يعمل إعلان معجون سنان - الابتسامه اللزجه دى مش بتتغير - المهم قاللى "يابرنز الليالى ،، أنا كنت باخد السوفت درينك بتاعى ولقيتك متحمس أوي وصوتك عالي ولقيت إنك شاب زي الورد ،، عايز تعبي البون - أمال أنا لازمتى فى الحياه بقى ؟! "ء
ولقيته بيبص لي أوي ونعكش لي شوية شعري متجاهلا إعتراضاتي وقعد يردد كلام عجيب على شاكله "فانتستك ،،سوفااج،،برافووو،، إسلوب عجيب فعلا ..هوااا داااا !ء
الراجل ده عبيط ولا إيه ؟!ء
بص إنت جديد من نوعك ،، صوره جديده على الناس وهتاكل معاهم أوى ،، طبعا كل الناس بتقول لك انتى تيجى أيه قصاد جموديه عمرو دياب اللى بيغنى من 25 سنه ،، ووصل للقمه وأنتخ عليها لسنوات كتيره ...هي حاجه تغيظ فعلا !، خصوصا لشاب زيك عايز ينجح ويعدي ويلعب بالفلوس لعب والموزز- لامؤاخذه يامودام - تتحدف قدامه ،، طبعا عمرودياب وصل للي وصله ده بعد سنين طويله وأيام ما كان الانتشار على التلفزيون ووجود الأنطرنت خيال علمي ! ، إنما إنت الحياه أسهل بالنسبه لك ..محسوبك خبير تلميع .. أنا اللى بصطاد اللى اللى زيك وبسنجفهم وأنضفهم وبظبطهم عشان أوصلهم للمجد والنجاح ، مش مهم صوتك حلو ولا لأ،، مش مهم يكون صوتك حلو ده أنت كمان مش مهم تكون بتعرف تقرا وتكتب أصلا ! المهم إنك تسمع الكلام وتنفذ حرفيا ..نقول لك تملى الكليب مزز تقول حاضر ونعم ،، نقول لك تلبس بنطلون واقع وتبين للساده المشاهدين -عدم اللامأخذه- "البوكسر" تنفذ ...ننشر عنك إشاعات عجيبه فى الجرايد عشان سيرتك تبقى على كل لسان طول الوقت ، برضه تنفذ ...نأجرلك مزز فى سن الضياع تترمى تحت رجلك فى الحفلات اللايف ،،برضه تندمج وتتدمع وتسهتن ،، أنا عايز صدق فى الاداء ،، أنا هوصلك وهلمعك وأعلى نجمك وهنغنغك فوق ما أنت متخيل ،، بس ياحلو هتمضى على عقد إحتكار امدة 30 سنه فى ظرف 6 أو 7 سنين هحط راسك براس عمرو دياب وعقدك دى هتروح !"ء
بنظره شيطانيه كده بصلي وبنفس الأبتسامه أياها قال: "ها،، دايس !"ء
ياترى علام هيدوس عشان يحقق حلمه وها يسحب البساط فعلا من عمرو دياب؟ تابعوناا
أحمد المصري
-----------------
