بعد مغامراتي الجامدة مع أبو دومه ،وعمرو دياب ،وفى الجامعة الخاصة ..أيه رأيكم نطير على أمريكا ،ونعمل حلقه على الهواء مباشرة من صحراء الأريزونا ؟
مشهد :نهار- خارجي
لأول لحظة ،هيظهر للمشاهدين إن الكادر ثابت ،إلا من بعض الرياح التي تحرك بعض نباتات الصبار البائسة في تلك الصحراء الجرداء ...الشمس الحارقة تحيلها إلى جهنم..تقترب الكاميرا ،وشوية شوية ...يظهر لنا من بعيد بني آدم واقف ودينا ضهره ...وسايب على الأرض ظلا عملاقا مخيفا ،يظهر هيئته ،كان فارغ الطول ،لابس اللبس المعتمد لأي كاوبوي بيحترم نفسه ..وبجواره حصان بيصهل بعنف ..بس نظرة واحده من الكاوبوي تخرسه تماما ...حصان مطيع!واصلت الكاميرا الأقتراب ..حتى توقفت وراءه تماما ..مازال مدينا ضهره فى قلة ذوق لا تخطئها عين ، وفجأة
يستدير لينا شاهرا مسدسه ومرددا أن: بانج ..بانج !ء
فلاش باك ..المكان - الغرب الأمريكي الشهير
محدش يعرف هو جيه منين بالظبط ..ناس بتقول أنه من المكسيك وكت من الحدود لأنه مدفعش قسط التلاجة ..ودي تعتبر جريمة فى المكسيك وناس بتقول إنه من أصول هنديه بعاداتها وطقوسها الممله ..اللي أهمها التدخين !ء
وهو كان عايز يستكشف العالم من حواليه ،وفى يوم ما خد القرار راح لجده - كان يتيم لأن أبوه وأمه قتلهم التدخين !- وقال له بنبرة صوت مراهق :جدو ياجدو ..أنا زهقت من التدخين ومن القبيلة ومنك إنت شخصيا ..كل يوم مش بعمل أي حاجه غير أني أدخن واطلع اصطاد غزلان ونقعد ناكلها بالليل حوالين النيران ..مستمعين للحكايات المملة بتاعة الشيوخ عن الأجداد ..وطبعا كان الدكر فينا اللي يقدر يكمل حكاية واحدة لأخرها ..كلنا بنتنبل بعد الوجبة الدسمة دي بس تقول لمين بقي ! ..أنا عايز أبقى شاب مطق طق .بإختصار أنا هلم حاجتي وهسألك الرحيل ..فسحب جده نفسا طويييييييلآمن الجوزة وقال له ووشه أحمر :مسااااااء الخيييير ..روح يا "علامنو" يا ابني وشق طريقك ..أنا لما كنت فى سنك كنت واخد الصحرا دي رايح جاي ..إييه كانت أيام ..الله لا يرجعها ..بس عملنا فلوس زي الفل ..أي والله !ء
أغلب الظن إن دى قصته الحقيقية ،بس مكنش بيتكلم عنها أبدا ومحدش يعرف ليه ،وسمعنا أنه رفض عروض كتير لتحويلها لمسلسل تلفزيوني ..زي مسلسل أم كلثوم كده ...أو حتى بيوجرافي زي برنامج عمرودياب ..
رحل علامنو من القبيلة وجال وصال في الصحراء وتعلم حياتها القاسية ،وبقى قلبه ميت ...لحد ما في يوم قابل واحد غير حياته تماما ...أيوة كان هو بعينه ..بشعره المسبسب ونظراته اللى بتطق شرار ..وحواجبه المرفوعة باستمرار ..ووسامته الشديدة ..لأ وسامة أيه ؟ ده عجز أوي ..بس هو برده كلينت إيستووود
اذبهل علامنو ...وصاح مرددا: أستاذ إيستوود ..أنا مش مصدق نفسي ..أنا بحب حضرتك جدا ..كنت بتفرج على كل أفلامك في تلفزيون القبيلة ..وكنا بنتسحب بالليل كلنا بعد ماكله ينام ..ونروح نأجر شري فيديو - ماكنش لسه الأنترنت ولا الدش دخل لهم - ونتفرج على أفلام حضرتك خصوصا فيلمك الرهيب
The good, the bad, the ugly
والنبي تمضي لي على التي شيرت
قهقهه إيستود قائلا :هيييه ...لقد كانت أياما عظيمة فعلا - كما تظهر الترجمة أسف الشاشة ومننساش إنها ترجمة أنيس عبيد - لقد عملنا فلوس زي الفل ! لقد نفذ التبغ مني ...فلتصبني اللعنة ! لكن ماذا أتى بك إلى هنا ؟ هل تبحث عن ماما أيها الصغير ...ها ها ها ها
اتغاظ علامنو وقال : أنا مش صغير ولا بدور على ماما ...أنا عايز أبقى زيك ..أبقى سيد الصحراء ،أعظم كاوبوي جه في تاريخ البني أدمين ...عايزك تعلمني وأستفيد من خبرتك ...إنت كنت برنجي الكاوبويات كلهم ..أرجوك ،علمني
لنعرف كيف كان لإيستوود دور محوري في حياة علامنو وماذا حدث بعد ذلك ...تابعونا
أحمد المصري
--------
