^
^
^
إلا دايس ! الفرصه مابتجيش للبني آدم غير مره واحدة ، ولو ضيعها يبقى بهيم !وقد كان -فى ظرف شهرين يا بشوات ، كانت أغنيتى السنجل "هيام" مدغدغه الدنيا - وبقى الكوبليه العاتفي:"حبنا كان أقوى من الأيام ..هفضل أحبك أنا يا هيام" على كل لسان ونغمه في كل موبايل ، وبقى حديث الشارع المصري بيدور حوالين هذا المطرب المنكوش صاحب الكليب المليان بنات لبناني تعقققققد ! وكثرت الحوارات الصحفية واللقاءات التلفزيونيه مع جنابي
وهنا بقى ولإنى مع منتج دؤرم وإبن سوق ، إبتدى الجزء التاني من خطة التظبيط والتسبيط ل "علام" المطرب الجديد واللي كانت بتتلخص فى إنه مايبقاش على لساني غير نغمة واحدة طول الوقت ألا وهي "عمرو دياب مصمم يحاربني فى أكل عيشى! "، وتصدرت العناوين الناريه لقاءاتي على غرار :" عمورة عايز يلهط لوحده !" ،"دياب بياخد بنات كليباتي فى كليباته !" ، "علام لعمورة :عيش و سيبني أعيش"، "لو هو دياب أنا شمبانزي !" ، "وربنا ما إتجوزت هيام عرفي!"ء
وبعد الزوبعة والدوشة الجامدة دي اللي قلبت الدنيا -وفي مكان أخر بعيد ، وتحديدا فى قصر "عمرو دياب" على الطريق الصحراوي - دارت تلك المحادثة
مدير أعمال عمرو: أنا مش فاهم الزفت إللي اسمه علام ده عايز إيه بالظبط ؟ داير يجيب سيرتك في كل مكان - في مطرب في الدنيا يبقى منكوش كده وأسمه علام !ء
عمرو: يا سيدي ،-ياما اتهاجمت وياما الجرايد الصفرا الفت وكتبت قصص عجيبة- واهو الحمد لله طول عمري باصص لقدام -وأكيد مش هابص لمطرب أسمه علام يعني !ء
مدير أعمال عمرو: يا عمرو باشا ...الواد مكسر الدنيا باغنيته دى اللى أسمها هيام ، دا الجرايد كلها كاتبه إنه كلك فى السوق!ء
عمرو بإبتسامه واسعه: وهوا يعني عشان الجرايد كتبت كده تبقى دى الحقيقه ؟ إيه يا بيه هوا إنت مش عارف إللى فيها يعني ولا إيه ..وبعدين يا سيدي خلب الواد يفرحله يومين ..إنت يعنى متخيل إن الناس دى هتفضل تجيب في سيرة هيام دى كتير !ء
وكأن دياب كان بيتنبأ فعلا- أيام كتير عدت ونزل ألبوم دياب الجديد السوق وكسر الدنيا كالعادة ،بس لأن الألبوم ده بيصادف مرور 25 سنه على مشوار الهضبه الناجح بشكل مستفز !..فكان مختلف فى كل حاجه حتى فى نجاحه ..الألبوم الناس بقت نايمه صاحيه تحلم بيه ،، وطبعا كان بديهي تكون حالة علام تصعب على الكافر - لأنه كان قرب يصدق إن راسه بقت برأس عمرو دياب فعلا ..وبالتالى الصدمه كانت صعبه عليه وبقى ماشي يكسر فى البيت ويزعق في ناس وهميين ويردد عباره عجيبه عن : أنا معدتش عايز كباب - عملها عمرو دياب -عمللللها عمرو دياااااب! وبقت الحاجه أم علام والحاج وأخوه سماعين بيمصمصوا الشفايف عن : علام يا ولداه إتجنن ولسع ! واتخطبت سيهير لأول عريس جاهز وعنده عربية زرفيز !ء
وبكده يكون خلص الصراع غير المتكافىء بين"عمورة " باشا دياب و "علام " المطرب اللي فهم أخيرا... إن الجريمه لاتفيد !وإن أي شاب وأي فتاة عايزين يبقوا زى "عمرو دياب" أو ينافسوه لازم قبلها يشربوا لبن "باور فاميلي"!ء
أحمد المصري
--------------
No comments:
Post a Comment