يا صباح الخير ع اللي معانا .. ع اللي معااانا>.. ء >-
عايزينها تبقى خضرا ..الارض اللى فى الصحرا >..ء >-
على صوت "الست" ممزوجا بمزيكا تتر الفقرة الزراعية في صباح الخير يا مصر
"إصحى يا علاااااام ..إصحى جتك القرف ..هتتأخر على كليتك "-
دوى صوت "الحاجه فى ارجاء" العباسيه" كلها فإزدادت عبوسا ،معلنا ان ميعاد صحيان جنابى قد حان بس انا كنت
ساعتها نايم وبهرتل بصوت عالى،، ء
، نياهاهاهاهاه لا يا "جوليا" لا ، مكنتش اعرف ان دمك خفيف كده ،بس بجد دورك الأخرانى كان فانتستك ،أستك ،تك ك ك
!أستك مين وفانتستك أيه ياواد يا أهبل انت ،قوم فز ..أمك صدعت المنطقه كلها
ده كان طبعا صوت "سماعين" أخويا ، صحانى من أحلاها نومة وأنا كنت خلاص هبوس "جوليا روبرتس"على "الريد كاربت " فى "كان"! بصيت له بإشمئزاز وقلت فى سرى
اللهم لا اعتراض - دى خلقه ربنا برضه !ء
خلاص صحيت ياعم ، ممكن تشيل فخدك ده من على وش أهلى
قمت غسلت وشى ونكشت شعرى ،وسنجفت دقنى وانا بدندن بأستمتاع ، علي الضحكااااايه علي ..يا أم الضحكاايه حكايييه ..وعلللللللي علللللللللللللي
وفجأه لقيت الارض بتترج جامد، وكل حاجه قدامى بتقع وتتكسر ، والصويت والصريخ مالى الحاره "فى ايه يا جدعاااان"، "زلزال ده ولا ايه ؟" ..جريت بسرعه على الشباك ،لقيت -خير اللهم اجعله خير - الدنيا بقت إسود في إسود ،الشمس مش باينه كأن فيه سحابه رزله معديه قدامها ، بس الحقيقه إنها مكنتش سحابه ..كانت حاجه أسخم ! كائن هلامى ..ضخم أخر حاجه ، فخده مكان دراعه وكرشه 10 متر قدامه ،طوله بتاع 15 هكتار تقريبا !، لو كنت اتفرجت على إعلان المعلم اللى إشترى "الجامبو" فبقى عامل زيها ، يبقى سهلت عليا كتير
ولقيت صوت هلامى برضه طالع من الاخ ده بيقول : نياهاهاهاهاهاه ، انا أبو دومه يا بنى اااادميييييين ،يعنى الجامبو والفاميلى سايز والهرم الاكبر وناس تخوفو ماتختيشيش ، لو فيكم دكر يطلع لى الهسبسبسهسة ، انا بقول اهو!ء
مافكرتش كتير ، انا" ذا إنكريدبل علام "الشاب الخارق اللى كرس حياته لمحاربة الوحشين الكوخين ،سامع واحد بيقول
"وانت بقيت خارق إزاى ياعم الخارق؟ "
اقول له "فيه نبره تريقه في صوتك مش عجبانى يا واطي "، وأمسك في خناقه فعلا لولا بعض القراء ولاد الحلال اللى هيخلصونا من بعض!، مواصفات الخرقنه يابنى بتتلخص كل يوم فى الوقوف كل يوم فى طوابير العيش ،للحصول على رغيف فاخر مطعم بالمسامير، وللمحظوظين بالفيران -تزاحم فى ده وتضرب فى ده،وتتسكع قفا من ده ،وكمان تجرى لك كل يوم 15 كيلو ورا الاتوبيس وإنت رايح كليتك ،متلاحما مع بقية المواطنين اللى بيجروا جنبك -وساعات كتير فوقك !ولا كأنه اختراق الضاحيه من كل ناحيه ،كمان المواظبه على اكل الفول المسوس -إذا لقيته يعنى !-والانتظام فى مشاهدة برامج التلفزيون المصرى ، تبقى خلاص الخلطه جاهزه وبقيت بطل خارق..خارق للعادة ! مش ناقصك بس غير إنك تفصل "بدلة" الابطال عند "أم ذكى" الخياطه ...وتبقى "ذا انكريدبل علاااااااام "ء
شفت يا عم الامور ، كل الوقت اللى ضيعته بسببك في الرغي ده، خلى "أبو دومه " يلتهم ما لا يقل عن 10 بنى آدمين على سبيل فاتح للشهيه قبل التهام وجبه "العباسيه" على الغداء!ء
يا ترى ايه تفاصيل المواجهه ما بينى ومابين "أبو دومه"؟ وهل هقدر انقذ "العباسيه" من المصير البشع الذى ينتظرها ؟، وهل جميلات العباسيه هتترمى تحت رجلين العبد لله؟ ولا هيكون مصيرى في كرش أبو دومه! قاتل مع "ذا انكريدبل علااام "بكل جوارحك ...و احرص على متابعه الحلقه القادمه وانا اوعدكم بمزيد من الاثاره والتشويق ..نياهاهاهاع هع هع هع - قاطعت ضحكات أبو دومه الشريره أفكارى - ادعوا لى والنبى !ء
أحمد المصري
--------------------
No comments:
Post a Comment